Benvidos e benvidas ás Cabanas Prehistóricas do Outeiro das Mouras. Este proxecto de musealización desenvólvese pola Comunidade de Montes Veciñais en Man Común de Salcedo (Pontevedra) coa finalidade de crear un Centro de Interpretación sobre a prehistoria recente da parroquia, así como un espazo de actividades múltiples ao ar libre.
Que forma máis interactiva hai para amosar e recoñecer o noso pasado que integrarse na forma de vida das persoas que realizaron os gravados rupestres ou construíron as mámoas espalladas pola nosa contorna, que conta cun patrimonio arqueolóxico destacado, en Salcedo mesmo, como o conxunto rupestre do Outeiro das Mouras / A Chan das Mouras (Regato dos Buratos/Outeiro da Mina), con máis de 7 grupos de gravados ...
As vivendas foron deseñadas coma un proxecto de arqueoloxía experimental, buscando referentes e materiais arqueolóxicos para facer unha réplica o máis fiable posible dun poboado dos períodos prehistóricos do Calcolítico/Idade do Bronce.
Non se coñecen aínda lugares nas inmediacións que presenten indicios dun asentamento (si os hai para a Idade do Ferro), pero é indubidable que as persoas que fixeron os gravados de Outeiro das Mouras viviron nos arredores destes xacementos, como ocorre noutras zonas da nosa xeografía.
O poboado construíuse a partir da información arqueolóxica e paleoambiental existente, a través dun exercicio de arqueoloxía experimental. Para a súa construción empregáronse os mesmos materiais efémeros utilizados nas construcións orixinais (madeira, palla, barro e materia vexetal en xeral); aínda que os materiais son perecedoiros construíronse para que a súa perdurabilidade sexa longa no tempo.[ Ler máis ... ]
Polas súas dimensións a estrutura foi reforzada cun sistema de columnas e vigas sobre as que descansan os durmintes do teito, restándolle peso á estrutura. O teito é a dúas augas cuberto cos mollos de xesta.
Hai que imaxinar a cabana cos obxectos do/a xamán, útiles para comunicarse cos espíritos, para facer curacións, ou mesmo para acceder ao mundo do alén e propiciar a caza ou as boas colleitas.
Lugar de dormitorio e das escenas domésticas máis comúns, terían fogares centrais e mobiliario de uso común. Son outras das estruturas documentadas no rexistro arqueolóxico, pequenas estruturas circulares escavadas no chan para cimentar as súas paredes.
Como complemento do espazo exterior das cabanas construíronse diferentes elementos asociados coa sociedade dedicada á agricultura e gandería da Idade dos Metais.